பயிர் சாகுபடியில் நன்மை செய்யும் நுண்ணுயிரிகளின் செயல்பாடுகள்
மண் வளமே மனித வளம் என்பது நிதர்சனமான கூற்று இதில் எவ்வித மாற்றக் கருத்தும் கிடையாது. கைப்பிடி மண்ணில் எண்ணற்ற நுண்ணுயிரிகள் வாழ்கிறது. பொதுவாக இவற்றை நன்மை மற்றும் தீமை செய்யும் நுண்ணுயிரிகள் என இரண்டாக பிரிக்கலாம்.
முறையற்ற உர மேலாண்மை யுக்திகள், ரசாயன மருந்து பயன்பாடு, தட்பவெப்ப சூழ்நிலை, மண்ணின் தன்மை மற்றும் கார அமிலத்தில் மாறு படுதல் போன்ற பல்வேறு காரணங்களால் மண்ணில் இருக்கக்கூடிய நன்மை செய்யும் நுண்ணுயிர்களின் எண்ணிக்கை வெகுவாக குறைந்து வருகிறது.
விவசாயத்தில் இந்த நன்மை செய்யும் நுண்ணுயிரிகளில் பயன்கள் என்னவென்று விரிவாக இந்த பதிவில் பார்ப்போம்.
ஊட்டச்சத்துக்களை கிடைக்கச் செய்தல்:
அசோஸ்பைரில்லம், ரைசோபியம், அசட்டோபாக்டர் போன்ற நுண்ணுயிரிகள் வளிமண்டலத்தில் இருக்கக்கூடிய நைட்ரஜனை மாற்றி தலைச்சத்தாக மண்ணில் நிலை நிறுத்தி தருகிறது.
இதனால் 20% தழைச்சத்து தேவை இயற்கையாகவே நாம் பூர்த்தி செய்து விடலாம்.
இதேபோன்று மண்ணில் பயிர்களுக்கு கிடைக்காத வண்ணம் இருக்கும் மணிச்சத்தை பயிர்களுக்கு ஏற்றவாறு கிடைக்கச் செய்வதும் நன்மை செய்யும் நுண்ணுயிரி யான பாஸ்போபாக்டீரியா ஆகும்.
இந்த பாக்டீரியா மண்ணில் பல்கி பெருகும் பொழுது இதனால் வெளியிடப்படும் ஆர்கானிக் ஆசிட் மூலக்கூறுகள் மண்ணில் அலுமினியம், இரும்பு, கால்சியம் போன்ற சத்துக்களுடன் பிணைந்து இருக்கும் மணி சத்தை பிரித்து பயிர்களுக்கு கொடுக்கிறது. இதன் மூலம் 20 முதல் 40 சதவீதம் வரை மணிச்சத்து தேவையை வெகுவாக குறைக்கலாம்.
வேம் பூஞ்சை போன்ற நுண்ணுயிரிகள் பயிர்களில் காணப்படும் வேர்களின் எண்ணிக்கையை அதிகப்படுத்துவதுடன், அதன் நீளம் மற்றும் சல்லி வேர்களின் எண்ணிக்கை ஆகியவற்றை அதிகரிப்பதால் பயிர்கள் நீர் மற்றும் ஊட்டச்சத்துக்களை எடுத்துக்கொள்ளும் திறன் மேம்படுகிறது.
இது மட்டும் இன்றி வறட்சியை தாங்கி வளர்தல் நோய் மற்றும் பூச்சி தாக்குதலை தாங்கி வளர்தல் போன்ற பண்புகளும் காணப்படும்.
நோய் மற்றும் பூச்சி கட்டுப்பாடு:
மண்ணில் இருக்கும் நன்மை செய்யும் நுண்ணுயிரிகள் பல்வேறு நோய் பூஞ்சை மற்றும் பூச்சி காரணிகளை அழித்து பயிர்களை பாதுகாக்கிறது.
நுண்ணுயிரிகள் நோய் காரணிகளுக்கு எதிராக இடம் மற்றும் ஊட்டச்சத்துக்களை கிடைக்க விடாமல் செய்வதாலும்,
தீமை செய்யும் நோய் காரணிகளுக்கு எதிராக நோய் எதிர்ப்பு காரணிகளை உற்பத்தி செய்வதன் மூலமாகவும் நோய் மற்றும் பூச்சி தாக்குதலை குறைக்கலாம்.
இதை தவிர இதை மறைமுகமாக பயிர்களில் நோய் எதிர்ப்புத் தன்மையை ஏற்படுத்தியும் உதவி புரிகிறது.
வளமான மண்ணில் இருக்கக்கூடிய நன்மை செய்யும் நுண்ணுயிரிகளினால் சுமார் 15% முதல் 25% வரை நோய் தாக்குதல் குறைந்து காணப்படும்.
மண் தன்மையை மேம்படுத்துதல் ..
பயிர்களுடன் வேர்ப்பகுதியில் இணைந்து வாழும் வேம் போன்ற மைக் கோரைசா போன்ற நுண்ணுயிரிகள் ஒரு சில திரவங்களை வெளியிடுவதன் மூலம் மண் தன்மை மேம்படுகிறது.
இதன் மூலம் மண்ணின் நீர் மற்றும் ஊட்டச்சத்து பிடிப்பு திறன் 20 சதவீதம் வரை அதிகரிக்கும்.
மண்ணிற்கு பொலபொலப்பு தன்மையை கொடுத்து வேறு வளர்ச்சி அதிகப்படுத்தி ஒட்டுமொத்த பயிர் வளர்ச்சி மேம்படுத்தும்.
மக்க வைத்தல்:
மண்ணில் காணப்படும் இயற்கை கழிவுகளை அல்லது பயிர்க் கழிவுகளை மக்க வைக்கிறது.
இதனால் மண்ணில் கரிம கார்பன் மற்றும் இதர ஊட்டச்சத்துக்கள் அதிகரிக்கிறது.
இது மட்டும் இன்றி மண் கட்டிகளை உடைப்பதன் மூலம் பயிர் வளர்ச்சி நன்றாக காணப்படும்.
இதர பணிகள்:
உயிர் உரங்கள் மற்றும் பூச்சிக்கொல்லிகளை பயன்படுத்தும்பொழுது ரசாயன பயன்பாடு வெகுவாக குறைகிறது இதனால் சுற்றுச்சூழல் பாதிப்படைவது குறைகிறது மேலும் நிலத்தடி நீர் ரசாயனம் கலக்காமல் பாதுகாக்கப்படும்.
தொடர்ச்சியான பயன்பாட்டின் பொழுது மண்ணில் இருக்கக்கூடிய கன உலோகங்களை படிப்படியாக கரைத்து மண்ணை விட்டு நீக்குகிறது.
நன்மை செய்யும் நுண்ணுயிரிகள் வளர்ச்சி உருக்கிகளையும் பயிர்களுக்கு கொடுக்கிறது
மண்ணின் கார அமில தன்மையை நடுநிலை படுத்துவதற்கு உதவி புரிகிறது.
0 Comments:
கருத்துரையிடுக